Parlamentario Misha Raymond a manda carta pa Hulanda relaciona cu e RAFT

𝐴𝑟𝑢𝑏𝑎 𝑚𝑒𝑠𝑡𝑒𝑟 𝑝𝑢𝑟𝑏𝑎 ℎ𝑎𝑦𝑎 𝑢𝑛 𝑚𝑖ℎ𝑜 𝑎𝑐𝑢𝑒𝑟𝑑𝑜 𝑐𝑢 𝐻𝑢𝑙𝑎𝑛𝑑𝑎.

​Fin di juni 2023, lider di fraccion di RAIZ, Misha Raymond, cu sosten di su fraccion y fraccion di MEP, a manda un carta pa Hulanda relaciona cu e mocion cu a wordo entrega den Tweede Kamer cu ta trata e refinanciamento di e debe di Covid-19 y RAFT (Rijkswet Aruba Financieel Toezicht). E mocion a urgi Gobierno Hulandes refinancia e debe di Aruba na un interes abou solamente si Aruba bay di acuerdo cu e RAFT pa asina Hulanda tin mas control riba supervision y normanan finaciero pa Aruba.

Ta asina cu maneho y supervision di finansa di Gobierno di Aruba ta un responsabilidad y asunto autonomo di pais Aruba. Parlamentario Misha Raymond ta subraya esaki den su carta y tambe ta reconoce e importancia di supervision duradero pa cu finansas di nos pais, pero no ta kere cu e RAFT ta e miho manera pa regla supervision financiero duradero, ni ta kere cu e RAFT ta necesario pa duna Hulanda e siguransa cu nan ta pidi. Es mas, impone un rijkswet mientras cu tin otro miho opcion, manera stipula condicionnan pa cu e prestamo den un contracto di fiansa, lo mina e autoridad cu representantenan di pueblo tin pa autodetermina kico ta miho pa nos pais.

Ta conclui e carta cu e peticion pa Hulanda no haci e Rijkswet e meta, sino pa sigui purba na yega e meta berdadero: pa e pueblo di Aruba beneficia di stabilidad y finansas publico duradero, y pa Hulanda por ta sigur cu Aruba lo paga e fiansanan bek. Simplemente acepta loke Hulanda a pone riba mesa, no ta alinia suficiente cu e interesnan di Aruba. #MishaRaymond #RAFT #RaizDenParlamento #LuchaPaAruba

Lesa e carta akinan: https://t.ly/2WJLw