𝐏𝐚𝐫𝐥𝐚𝐦𝐞𝐧𝐭𝐚𝐫𝐢𝐨𝐧𝐚𝐧 𝐝𝐢 𝐑𝐀𝐈𝐙 𝐲 𝐀𝐜𝐜𝐢𝐨𝐧𝟐𝟏 𝐚 𝐞𝐧𝐭𝐫𝐞𝐠𝐚 𝐜𝐚𝐫𝐭𝐚 𝐧'𝐞 𝐏𝐫𝐞𝐬𝐢𝐝𝐞𝐧𝐭𝐞 𝐝𝐢 𝐏𝐚𝐫𝐥𝐚𝐦𝐞𝐧𝐭𝐨 𝐩𝐚 𝐟𝐢𝐡𝐚 𝐮𝐧 𝐟𝐞𝐜𝐡𝐚 𝐩𝐚 𝐭𝐫𝐚𝐭𝐚 𝐞 𝐥𝐞𝐲 𝐝𝐢 𝐦𝐚𝐭𝐫𝐢𝐦𝐨𝐧𝐢𝐨 𝐞𝐧𝐭𝐫𝐞 𝐩𝐚𝐫𝐞𝐡𝐚 𝐝𝐢 𝐦𝐞𝐬𝐮𝐧 𝐬𝐞𝐱𝐨

Parlamentario Misha Raymond, sosteni pa parlamentarionan Raymond Kamperveen y Miguel Mansur, a haci un peticion na Presidente di Parlamento pa yama un reunion publico pa trata e ley pa habri matrimonio entre parehanan di mesun sexo.

Den e carta, entrega riba diaranson 21 di februari, ta indica cu desde 9 di october 2023, Parlamento a haya e "nota naar aanleiding van het verslag", y cu desde cu Parlamento a ricibi esaki, e ley pa habri matrimonio pa pareha di mesun sexo, ta cla pa wordo trata den un reunion publico den Parlamento.

Ta splica den e carta cu a tene consideracion cu e peticion pa warda y laga reunionnan di comision tuma luga prome cu trata e ley. Presidente di Parlamento a indica cu e reunionnan di comision lo termina fin di januari, y cu pa e prome siman di februari lo yama e reunion publico. Realidad ta cu ainda esaki no a tuma luga.

Presidente di Parlamento tambe a indica cu kier warda riba e decision di corte (Hoge Raad) riba e caso den casacion, prome cu Parlamento trata e ley. Sinembargo ta keda e responsabilidad y trabou di Parlamento, como co-legislador, pa debati y tuma un decision riba e concepto di ley di matrimonio entre pareha di mesun sexo. Por medio di un debate publico, cada parlamentario ta haya e espacio pa por expresa su argumentonan, motivacion, y voto, zonder last.

Finalisando e carta, Parlamentario Misha Raymond, hunto cu coleganan Parlamentario Raymond Kamperveen y Miguel Mansur, ta urgi Presidente di Parlamento pa conforme articulo 23, di Reglement van Orde voor de Staten van Aruba, ta prescribi, yama e reunion publico pa e ley wordo trata dentro di 30 dia.